[幸晴遊世界 – 台灣] 旅行總結

Author: roy1103jo
February 14, 2016

遊記算係打晒啦, 有D景點冇講, 我覺得唔去都罷既, 哈哈哈, 比起以前單身去旅行搶平機票, 平酒店既日子, 依家真係唔同晒啦, 雖然…我都繼續係買平機票, 繼續坐經濟艙, 繼續揀平酒店, 但注意既野已經多左好多啦!

訂機票既時候, 記住訂埋BB餐, 原來都唔夠….仲要去到機場CHECK IN時再同地勤確認多次, 我地去果程就係冇確認, 結果上到飛機先話冇BB餐….不過空姐都好好人, 即刻幫我地確認多次回程既餐飲服務, 返黎果程地勤就話已經訂左啦! 而空姐亦都提左我地, 去到機場最好再同地勤確認多次, 唔好彩冇BB餐既話都有時間比航空公司去搵個BB餐放上飛機(雖然唔可以100%肯定有)
至於酒店…..我就真係比呢個陰到…..事前已經電郵去晒酒店問BB床問題, 結果……台北西門町果間俞X酒店係電郵答我有, 去到CHECK IN時我再問多次, 果時個姐姐話升級比我地住間大房會有2張雙人床, 咁我諗住是但啦, 都係一兩晚姐……上到房發覺牙刷毛巾全部都係得一套…..CALL左落去叫人送多一套上黎以為搞掂晒啦, 點知經典既事情發生啦!!! 居然有一張床上面係乜都冇架! 枕頭, 綿被完全冇架, 點解我地會留意唔到?!! 因為完全冇諗過會發生呢D事架嘛!!! 幸晴爸話夜啦唔好煩, 一陣嘈到個女…..話第二朝先….第二落到大堂, 個經理話: “我地會盡力搵比你“, 下咩叫盡力? 根本就一定要比我地架嘛!!! 條友仲答我: “因為你地升級左“, 要知道媽媽既戰鬥力係相當驚人, 佢簡直就係辣興我! 我要爆啦!!! “下! 你冇綿被比人, 咁憑乜野話係升級? 要我地3個逼埋一張床? 定係驚得BB唔駛蓋被呀!“, 然後佢都係答我會盡力…..幸晴爸就一副”死啦, 你得罪左酒店”既樣望住我, 然後拉我走…….結果返到去咪又係乜都冇!!! 原本想再打落去嘈, 不過幸晴爸話算, 廢事佢比D被都唔知係咩被……..呢間台北西門町既俞X酒店永世BLACK LIST呀!!!!
去旅行既地方要方便, 唔駛搭車又搭船先到, 如果真係去得麻煩但又好想去, 我依家會選擇包車或者租車, 包車比租車貴, 但唔駛怕迷路, 唔駛怕行錯路(雖則有導航, 但D男人好鍾意唔信導航), 唔駛怕冇位泊車等等~~所以今次我地最後都搵左包車, 有時我地行完要行既景點但仲未夠鐘食飯, 司機會車我地去其他景點參觀遊覽先, 等到夠鐘先去食飯; 而去到旅程第三日, 幸晴爸同我講 “好彩包車咋, 唔係實累死我”…..所以包車定租車真係好見仁見智
揀完去既國家, 會落力搵岩BB玩既地方, 幸好我地兩個大人都唔鍾意行街買野, 所以去晒玩都冇問題! 同BB去玩做足功課真係好緊要, 但慶幸依家網路資訊發達, 上網一搵就有, 唔駛怕, 不過某D親子餐廳係要早成個月, 甚至2個月預約, 所以如果真係有興趣就記得預約左先啦!!!
五天行程:
DAY 1: 香港 –> 台北 –> 宜蘭(包車) –> 酒店玩
DAY 2: 酒店玩 –> A.maze兔子迷宮咖啡餐廳 LUNCH (可預約)–>宜蘭藝術中心抓周 (需預約)–> 梅花湖 小熊書房CAFE –> 酒店 –> 羅東夜市
羅東夜市記住食包心粉圓呀! 好好味呀!! 另外卜肉都唔錯架~~

63794_1450402743zror

DAY 3: 宜農牧場 –> 菓風糖果屋 –> 山寨村 & 亞典年輪蛋糕密碼館 –>

貓極簡咖啡館 (可預約)–> 宜蘭車站 –> 柯氏蔥酒餅 –> 外澳東北角(沙灘) –> 蘭陽博物館 –> 台北西門町酒店 –> 美麗華商場 –> Moooon Spring Cafe & Play (鼓勵預約)–> 酒店

司機加既景點, 菓風總店, 呢度有得DIY整糖果架, 不過要打去預約左先, 同埋有限時間架, 我地就冇整到, 只係係度買左D手信

63794_1450402715iI1g

司機加既景點, 山寨村, 其實係賣手信既地方, 好細下, 我地行左一ROUND就走…..至於幸晴驚唔驚隻怪獸?!! 佢呢…佢…訓左…..乜都睇唔到

63794_1450402713EhPU

司機加既景點, 亞典年輪蛋糕密碼館 係山寨村隔離, 行過去3分鐘….果度有免費咖啡飲, 同埋有得試食, 點知我地食完覺得麻麻地….所以食完就閃….

63794_1450402710DZjL

司機加既景點, 柯氏蔥油餅係司機叫我地去買既, 佢話平時閒閒地都要排一小時, 今日見少人所以叫我地去買, 平得黎又好味! 推介!!! 記住加辣加蛋呀!

63794_1450402719VqJY

司機加既景點, 佢話想比幸晴玩下沙, 外澳東北角沙灘, 呢度好大, D沙好幼, 不過果日好大風……又係影完相就閃

63794_1450402723Ood3

蘭陽博物館, 我地讀得書少, 所以….影完相用下個育嬰室換片就走

63794_1450402725joKX

63794_14504027318kBZ

DAY 4: 酒店 –> 中山親子館 (需預約) –> 大樹站 (需預約) –> 大樹先生的家 (需預約) –> 酒店
DAY 5: 台北醫院睇醫生 –> 龍山寺站買八仙果 –> 西門町慢遊 –> 離線咖啡 –> 台北機場 –> 香港
西門町

63794_1449460464gW0d

桃園機場育嬰室, 泵完奶先上機, 岩岩好有新鮮既比幸晴飲, 我泵奶佢就訓低飲下水

63794_1450402735NPSS

桃園機場育嬰室, 係有尿片供應!!! 不過我地都係用返自己既, 呢D就留比緊急需要用既BB啦!

63794_1450402738Ok1l

HELLO KITTY 專機專屬兒童餐, 原來唔係幫幸晴訂左BB罐頭, 而係訂左兒童餐…..正呀! 好食過大人既飛機餐

63794_1450402740d2sk

去完旅行返黎, 幸晴講多左野, 發多左好多個音, 同埋行多左好多路, 返到屋企終於行到一兩步, 都算係旅行既一大進步呢!!!

原文轉載自: http://wow.esdlife.com/space.php?uid=63794&do=blog&id=276606

Spread the love

About the author

Leave a reply

You must be logged in to post a comment.